ស្លាប់ពីរ​នាក់​​ក្នុង​​គ្រោះថ្នាក់​ធ្លាក់​ឧទ្ធម្ភាគចក្រ​នៅ​ឡុងដុង​

ហេតុការណ៍​ធ្លាក់ ​ឧទ្ធម្ភាគចក្រ​កណ្ដាល​ក្រុង​ឡុងដុង​ ចក្រភព​អង់គ្លេស​ ​ដែល​បង្ក​ឲ្យ​មាន​ការ​ភ្ញាក់ផ្អើល​ជា​ខ្លាំង​នៅ​​​ក្បែរ​ Battersea Bridge ​សង្កាត់​ Vauxhall ​កាល​ពី​ម្សិល​មិញ​ បាន​បណ្ដាល​ឲ្យ​មនុស្ស​ចំនួន​ពីរ​នាក់​ស្លាប់​បាត់បង់​ជីវិត ​និង​​ ១២​ ​នាក់​ផ្សេង​ទៀត​រង​របួស។ ​តាម​​ការ ​សន្និដ្ឋាន​របស់​សមត្ថកិច្ច​ថា ​មូលហេតុ​ដែល​បណ្ដាល​ឲ្យ​ឧទ្ធម្ភាគចក្រ​​​ធ្លាក់​កណ្ដាល​ក្រុង​បែប​នេះ​គឺ ​បណ្ដាល​មក​ពី​អាកាសធាតុ​អាក្រក់​ដែល​បង្ក​ឲ្យ​មាន​អ័ព្ទ​ក្រាស់ ​​ធ្វើ​ឲ្យ​អ្នក​បើកបរ​មាន​ការ​ពិបាក​​​ក្នុង​ការ​​​​បញ្ជា​ឧទ្ធម្ភាគចក្រ។ ​​ខណៈ​ដែល​ ​អ្នក​បើកបរ​​ត្រៀម​បញ្ជា​ឧទ្ធម្ភាគចក្រ​ដើម្បី​បញ្ចៀស​ពី​អាកាសធាតុ​ អាក្រក់​ក៏​បាន​ប៉ះ​នឹង​បង្គោល​ស្ទូច​សម្ភារៈ​នៃ​អគារ​ស្នាក់នៅ​មួយ​ដែល​ កំពុង​សាងសង់​​ និង​វិល​ធ្លាក់​ចុះ​មក​ក្រោម​តែ​ម្ដង។

ទិដ្ឋភាព​នៅ​ពេល​កើតហេតុ​

​ ​ជនរងគ្រោះ​ពីរ​រូប​ដែល​បាត់បង់​ជីវិត​ត្រូវ​បាន​គេ​ស្គាល់​ឈ្មោះ​ថា ​Wood ​​មក​ពី​​ទីក្រុង Sutton ​ឡុងដុង​ខាងត្បូង​​ដែល​​គេ​ជឿ​ថា បាន​ស្លាប់​ក្រោយ​ឧទ្ធម្ភាគចក្រ​ធ្លាក់​លើ។ ​​ចំណែក​ជន​រងគ្រោះ​ម្នាក់​ទៀត​គឺ ​អ្នក​បើកបរ​ឧទ្ធម្ភាគចក្រ​ដ៏​ល្បីល្បាញ​គឺ​លោក​ ​Pete Barnes ​ដែល​ធ្លាប់​បើក​ឧទ្ធម្ភាគចក្រ​ថត​ខ្សែ​ភាពយន្ត​ឲ្យ​ផលិតកម្ម​ដ៏​ល្បី​គឺ​​ Hollywood ​និង​ធ្លាប់​បើក​ដឹក​ភ្ញៀវ​​​ជា​​អ្នក​នយោបាយ ​និង​តារា​ល្បីៗ​​​​ធ្វើ​ដំណើរ​ជុំវិញ​ចក្រភព​អង់គ្លេស​ផង​ដែរ៕

​អ្នក​បើកបរ​ឧទ្ធម្ភាគចក្រ​ដ៏​ល្បីល្បាញ​គឺ​លោក​ ​Pete Barnes​ ដែល​ជា​ជន​រងគ្រោះ​ម្នាក់​ក្នុង​ហេតុការណ៍​ខាង​លើ

ប្រែ​សម្រួល៖ Zac
ប្រភព៖ Huffingtonpost